Sprennlengerisch

Vun Sprennlenge, wie's vor Dog un Johr
mit etwa dreidausend Seele
noch e klaa Dörfche wor,
dodevo will ich was erzähle.

Da hatte mer kaa Fahrrod un kaa Audo,
es ging alles uff Schusters Rappe.
Aach Laderne wor'n kaa do,
im Dunkele mußt mer dappe.

Mer hatt' kaa Wasserleidung, kaa Strom un kaa Gas,
nor die, wo im Stall dhut stehe.
Vun de Aale des noch jedes waaß,
nor de Junge kenn's net verstehe.

Uff Madratze kennt mer aach net leeje:
's wor en Strohsack, hart un prall.
lns Bett mußt uff en Stuhl mer steje,
doch es wor gesund uff jeden Fall.

ln de Stubb un uff de Steje
lag noch kaa Linnolejum.
Weiße Sand hot druff geleje,
schrubbe mußt mer uff de Diel erum.

Wor aaner voll und hot randaliert,
kam in die Bälzkammer der Kannallje.
Die Schulkenn' hott des doch geriehrt,
wann der geguckt hot durch die Trallje.

Dhue mer an unsere Jugend denke -:
aach do hot mer gekennt die Not.
Am Bumbeschwengel dhat mer henke
un hot sich naß gebumbt sei Brot. 

Heit muß mer werklich driwwer lache,
was frieher unser Rathaus wor.
Staat wor mit dem doch kaum zu mache,
weil des im erste Stock jo wor.

ln aaner Stubb, do wor doch alles:
Gemaandekass', Drauzimmer, Sitzungssaal.
's wor grod wie uff em Dalles,
so brimitiv wor's dazumal.

En Disch hat in de Mitt gestanne,
mit dem wor net zu prahle,
wenn de Chrischtoff un de Sanne
ihr Steier wollte draa bezahle,

weil der doch stets gewaggelt hot.
Do wor voll Zorn de Milteberjer,
un die Buwe in ihrm Komblott,
die driewe's desto ärjer.

Ließ sich e Brautpaar kobbeliern,
do wor so eng de Trepp.
Sie konnte enannder net emol fiehrn,
un`s wor gut, daß de Braut do hot kaa Schlepp.

Aach unser Kerch sei net vergesse,
die uff em selwe Platz noch steht,
wo mer als Kind hot drin gesesse,
un hot gesunge un gebet.

Jed Stroßeeck kennt' wos berichte,
weil do gestonne hot es Born.
Uff Wasser konnt' mer net verzichte;
wor kaans dahaam, do hot mer Zorn.

Un an de Bumb, do hot gestanne
die Jakowee un die Lies
un die Katherin un die Sanne,
hon ihrn Salat gewäsche un Gemies.

Doch wor's aach frieher schee fürwohr
beim Baabambelches uff de Breck,
vor fimfzich, sechzich Johr,
wie mer Knebbstiwwel aahot un Sambel-Röck.

Katharina. Ott

Quelle: Ortschronik der Erasmus-Alberus-Gemeinde Sprendlingen 1957